Drejtoresha e Teatrit Kombëtar të Operës dhe Baletit, Abigeila Voshtina, ka qenë në Prishtinë, për të promovuar librin “Tingulli Magjik”. Libri me autore vetë Voshtinën, u drejtohet fëmijëve, me qëllimin për t’i njohur dhe afruar ata me operën. Libri me ilustrime është promovuar në kuadër të EDU Operës, një program interaktiv për nxënësit e shkollave fillore dhe të mesme të muzikës, në Kosovë, i mbështetur nga Ministria e Kulturës. Fëmijët e shkollave fillore që morën pjesë në këtë ngjarje, patën mundësi të ndjekin, po ashtu, provën gjenerale të shfaqjes “Flauti Magjik” të Operës së Kosovës, e cila e pati premierën mbrëmjen e djeshme. Opera u realizua në bashkëpunim artistët e Teatrit Kombëtar të Operës e Baletit dhe Ansamblit Popullor të Shqipërisë si dhe solistëve të rinj studentë të Universitetit të Arteve në Tiranë. Flauti Magjik, është operë në dy akte nga Wolfgang Amadeus Mozart me libret nga Emanuel Schikaneder. Premiera u shfaq për herë të parë më 30 shtator 1791, vetëm dy muaj përpara se kompozitori gjenial Mozart të ndahej nga jeta. Opera ‘Flauti magjik’, vazhdon të jetë një nga operat më shpesh të shfaqura në teatrot anembanë globit. atsh
- Advertisment -