Ministria e Inteligjencës e Iranit ka mohuar helmimin me gaz të vajzave në disa shkolla duke theksuar se hetimet e fundit nuk kishin zbuluar substanca toksike, tha agjencia “Irna”. Që nga fundi i nëntorit, mbi 5000 studente, kryesisht nga shkollat e vajzave, i janë nënshtruar sulmeve kimike. Besimi popullor është se qeveria u ka dhënë dritën jeshile këtyre sulmeve në shkallë të gjerë, në një përpjekje për të qetësuar valën e protestave kundër regjimit në Iran që filloi në shtator. “Roli i armiqve, përfshirë Shtetet e Bashkuara të Amerikës dhe Izraelin, dhe disidentëve, me qëllim të ndezjes së protestave të mëtejshme antiqeveritare në vend, është i pamohueshëm”, thuhet në një deklaratë të ministrisë. “Disa individë janë arrestuar për marrjen e pamjeve dhe dërgimin e tyre në rrjetet televizive disidente jashtë shtetit. Për më tepër, të gjithë ata që kanë akuzuar qeverinë si të përfshirë në këtë çështje do të ndiqen penalisht”, shtoi ministria. “Qindra persona janë arrestuar për përdorimin e bombave të vogla, të disponueshme në treg, me qëllim nxitjen e frikës në shoqëri”, sipas deklaratës së ministrisë.
- Advertisment -