Teatri Kombëtar Eksperimental “Kujtim Spahivogli” ka vënë në skenë dramën e Florian Zeller, “Nëna”, me regjinë e të mirënjohurit Mehmet Xhelili. Shfaqja interpretohet nga Ema Andrea, Helidon Fino, Xhuliano Brisku e Enisa Hysa. Shfaqja “Nëna”, e cilësuar nga autori i saj Florian Zeller si një farsë e zezë, ofron me mprehtësi të jashtëzakonshme dhe na ballafaqon, më shumë sesa një histori, me një përvojë që krijohet nëpërmjet saj. Në qendër të shfaqjes qëndron drama e nënës, me sëmundjen, krizën dhe dhimbjen e saj, por edhe personazheve të tjerë që e shkaktojnë apo janë viktima të saj. Dashuria amtare për të birin, largimi i të cilit nga shtëpia, përjetohet si tradhëti dhe nga devijimet e mundshme patologjike që e shoqërojnë. Kësaj situate i shtohet paralelisht një martesë e cila për këto arsye e të tjera është duke pësuar dekadencën e saj. Mesazhet e fuqishme të veprës, artikulojnë jo përgjigjen, por pyetjen ekzistenciale që nëna klith në fund të pjesës: Përse u desh të ndodhte kështu?! Shfaqja do të vijojë të shfaqet në ArTurbina për 4 net rresht.
