Zëvendëskryetari i Akademisë së Shkencave të Shqipërisë akad. Vasil Tole dhe kryetari i Seksionit të Shkencave Natyrore dhe Teknike pranë ASH, akad. Neki Frashëri, marrin pjesë në takimin ndërkombëtar të ISC-së të organizuar nga Akademia e Shkencave e Malit të Zi. Dy akademikët janë në Podgoricë për të konkretizuar disa hapa që do të ndërmerren për bashkëpunimin me Akademinë e Shkencave të Malit të Zi sipas disa pikave të përcaktuara në një takim të mëparshëm më 26 maj 2023. Takimi drejtohet nga Tarmo Soomere, kryetar aktual i anëtarëve europianë të ISC-së dhe kryetar i Akademisë të Shkencave së Estonisë. Temat kryesore të këtij takimi janë: A ka nevojë shkenca e mirë për demokraci; dekolonizimi i shkencës; sfidat në shkencë dhe inovacion në Mal të Zi; çfarë po ndodh në kontinent. Gjithashtu në takimin me akademikët e Malit te Zi, ku ishte e pranishme dhe ministrja e Edukimit, Shkencës dhe Teknologjisë, Biljana Stepanović, u shkëmbyen mendime për bashkëpunimin. Propozimet do të pasqyrohen në hartimin e një draftmarrëveshjeje të re për ta diskutuar së bashku në diskutimet dypalëshe gjatë 18-22 shtatorit me rastin e zhvillimit në Tiranë të Mbledhjes së Procesit të Berlinit, ku do të marrin pjesë akademitë e shkencave të rajonit. Akad. Vasil Tole dhe akad. Neki Frashëri kanë biseduar drejtpërdrejt me akademikët e Malit të Zi, për të konkretizuar hapat që do të ndërmerren.
- Advertisment -