Avionët RAF rrëzuan “një numër” dronësh sulmues pasi Irani nisi një sulm të paprecedentë ndaj Izraelit, konfirmoi sot kryeministri Rishi Sunak. Avionët luftarakë me bazë në Irak dhe Siri ishin vendosur për të përgjuar sulmet ajrore pasi Teherani njoftoi se do të niste një sulm të shtunën.
Kryeministri Sunak do t’i bashkohet liderëve të tjerë të G7 në një takim mes frikës së një përshkallëzimi të mëtejshëm në rast të një kundërsulmi të mundshëm izraelit. Sulmi i Iranit ndaj Izraelit erdhi si një përgjigje ndaj vrasjes së oficerëve të lartë iranianë në Siri, në një sulm të dyshuar ajror izraelit në fillim të këtij muaji. Kjo shënon herën e parë që një sulm i drejtpërdrejtë ushtarak është nisur nga Teherani ndaj Izraelit, pavarësisht armiqësisë që daton që nga Revolucioni Islamik i vendit të vitit 1979.
Britania e Madhe dhe SHBA-ja kanë ofruar mbështetje të vendosur për Izraelin, megjithëse Teherani ka kërcënuar se do të përgjigjej “ashpër” nëse Uashingtoni bashkëpunonte në ndonjë veprim të mëtejshëm ushtarak. Zëdhënësi i ushtrisë izraelite, admirali Daniel Hagari tha se 99% e më shumë se 300 dronëve dhe raketave balistike ishin rrëzuar jashtë kufijve të vendit.
