Spanja, Franca dhe Portugalia bien dakord për ndërtimin e gazsjellësit të tretë

Qeveritë e Spanjës, Francës dhe Portugalisë miratuan sot ndërtimin e gazsjellësit të tretë energjetik midis Gadishullit Iberik dhe Francës. Ata vendosën që propozimi për ndertimin e gazsjellësit “Midcat” midis Spanjës dhe Francës do të zëvendësohej nga një projekt i quajtur “Korridori i Energjisë së Gjelbër”. “Gazsjellësi i ri midis Barcelonës dhe Marsejës synon hidrogjenin e gjelbër. Megjithatë, ai do të furnizojë me gaz përkohësisht, për të frenuar ndikimin e krizës energjetike të shkaktuar nga “shantazhi” i liderit rus Vladimir Putin”, tha kryeministri spanjoll, Pedro Sanchez. Marrëveshja u arrit disa orë para fillimit të samitit të BE-së në Bruksel në një takim midis Sánchez, presidentit francez, Emmanuel Macron dhe kryeministrit të Portugalisë, Antonio Costa. “Projekti i ri do të diskutohet më tej më 9 dhjetor në Alicante, në Spanjën juglindore, në takimin mes krerëve të qeverive të vendeve mesdhetare dhe Portugalisë”, tha Sanchez. Macron tha se të tre udhëheqësit do të punonin shumë për të konkretizuar projektin në javët e ardhshme, duke e quajtur planin per ndertimin e gazsjellësit, një shenjë të rëndësishme të solidaritetit evropian. Macron tha se Korridori i Energjisë së Gjelbër ishte gjithashtu në përputhje me synimet e BE-së për tranzicionin klimatik dhe se shpresonte se projekti do të mbështetej nga fondet e BE-së. Gazsjellësi “Midcat” fillimisht ishte menduar të shtrihej nga Barcelona, përmes Pirenejve, në Barbaira në Francën jugore. Projekti u anulua në vitin 2017 për shkak të mungesës së fondeve dhe Macron fillimisht refuzoi propozimet për të vazhduar ndërtimin e tij.http://ata.gov.al/2022/10/20/madrid-spanja-franca-dhe-portugalia-bien-dakord-per-ndertimin-e-gazsjellesit-te-trete/