Shtyhet deri në 15 shtator dorëzimi i pasqyrave financiare të vitit 2021

Ministrja e Financave dhe Ekonomisë, Delina Ibrahimaj informoi sot se shtyhet deri në 15 shtator afati i dorëzimit të pasqyrave financiare të vitit 2021. Në 25 korrik, Ministria e Financave dhe Ekonomisë njoftoi se “bazuar në nenin 54 të Kodit të Procedurave Administrative, afati për depozitimin e pasqyrave financiare në regjistrin tregtar do të shtyhet për aq ditë sa nuk ka funksionuar portali qeveritar e-Albania. Subjektet që nuk kanë aplikuar akoma për depozitimin e pasqyrave financiare do të rivendosen për depozitimin e tyre brenda periudhës së shtyrjes së afatit fillestar”. Ndërkohë sot Qendra Kombëtare e Biznesit bëri të ditur se “duke u nisur nga problematikat e hasura nga subjektet tregtare ditët e fundit, për kryerjen me sukses të aplikimeve për depozitimin e pasqyrave financiare të vitit raportues 2021, njoftojmë se, bazuar në parashikimet e Kodit të Procedurave Administrative, afati i depozitimit të tyre shtyhet deri në datë 15 shtator 2022”. QKB ka përcaktuar edhe afatin e ri të dorëzimit, duke u dhënë bizneseve edhe gjashtë javë kohë për dorëzimin e pasqyrave financiare.https://ata.gov.al/2022/08/01/shtyhet-deri-ne-15-shtator-dorezimi-i-pasqyrave-financiare-te-vitit-2021/