Shqipëri-Francë, 60 milionë euro për rrjetin e ujësjellësit në Durrës

Qeveria shqiptare dhe Agjencia Franceze e Zhvillimit arritën sot një marrëveshje për financimin e rrjetit të ujësjellësit të Durrësit. Marrëveshja u nënshkrua në Tiranë, nga ministrja e Ekonomisë dhe Financave, Delina Ibrahimaj dhe sekretarja franceze e Shtetit për Çështjet Europiane, Laurence Bonne. Pas tërmetit të fortë të nëntorit të vitit 2019, qeveria franceze përmes Agjencisë Franceze të Zhvillimit mori përsipër rindërtimin e rrjetit të ujësjellësit të Durrësit, një prej zonave më të prekura nga tërmeti, përmes një kredie të butë prej 60 milionë euro dhe një granti për asistencë teknike prej 1 milion euro. Ministrja e Financave dhe Ekonomisë, Delina Ibrahimaj bëri të ditur se qeveria shqiptare ka nisur prej vitesh reformën e ujit, duke synuar furnizimin pa ndërprerje. Sipas saj, kjo kredi do të kontribuojë për realizimin e këtij synimi. Po ashtu, Ibrahimaj vuri në dukje se përmes këtij financimi do të përmirësohet edhe furnizimi në zonën e Fushë Kuqes dhe Fushë Krujës, si dhe do të ndikojë në optimizimin e rrjetit të furnizimit që nga matja, faturimi dhe mbledhja e detyrimeve. “Përmes kësaj kredie do të hartojmë një masterplan, jo vetëm për furnizimin e ujit të pijshëm, por edhe ndërtimin e rrjetit të kanalizimeve. Synojmë të arrihet kufizimi i ndikimeve mjedisore, përmes rritjes së cilësisë së burimeve dhe zhvillimit të një strategjie për çmimet dhe tarifat e furnizimit me ujë“, tha Ibrahimaj.https://ata.gov.al/2022/11/15/shqiperi-france-marreveshje-prej-60-milione-eurosh-per-rrjetin-e-ujesjellesit-ne-durres/