Ambasada Amerikane në Tiranë ka njoftuar përfundimin e suksesshëm të një kursi intensiv gjashtëjavor të hetimit të krimit, të zhvilluar në Akademinë e Sigurisë së Policisë së Shtetit në Tiranë. Ky trajnim i specializuar, u udhëhoq nga ekspertë të Programit Ndërkombëtar të Ndihmës për Trajnimin për Hetimet Penale të Departamentit të Drejtësisë në SHBA (ICITAP), ka certifikuar një klasë të re hetuesish të aftë.
Në ceremoninë e diplomimit morën pjesë figura të larta, duke përfshirë zëvendësshefja e Misionit në Detyrë, Kathryn Hammond, zëvendësdrejtori i Përgjithshëm i Policisë së Shtetit, Sokol Bizhga, dhe rektori i Akademisë së Sigurisë, Dr. Illirjan Mandro.
Një element i veçantë i kësaj klase ishte përfaqësimi i konsiderueshëm i grave dhe vajzave, të cilat përbënin gati gjysmën e grupit të trajnimit. Këto hetuese të reja do të aplikojnë aftësitë e tyre të përparuara për të zhvilluar dhe udhëhequr gjeneratën e ardhshme të drejtuesve të Policisë së Shtetit.
“Këta hetues me përvojë u pajisën me aftësi të përparuara trajnimi nga specialistë nga Programi Ndërkombëtar i Ndihmës për Trajnimin për Hetimet Penale të Departamentit të Drejtësisë në SHBA (ICITAP)”, njofton Ambasada e SHBA në Tiranë.
Që nga janari 2024, ICITAP, në bashkëpunim me Policinë e Shtetit dhe Akademinë e Sigurisë, ka trajnuar dhe certifikuar mbi 200 inspektorë të Policisë së Shtetit në hetimet e krimeve bazë. Ky program ka për qëllim përmirësimin e kapaciteteve hetimore të forcave të rendit në Shqipëri dhe rritjen e efektivitetit të tyre në luftën kundër krimit.
Ambasada Amerikane përgëzon të gjithë të diplomuarit për përkushtimin dhe arritjet e tyre dhe shprehet e bindur se këta hetues të rinj do të luajnë një rol kyç në ruajtjen e rendit dhe sigurisë publike në Shqipëri.
