Shtetet e Bashkuara kanë dënuar sulmin kibernetik të Iranit ndaj sistemit TIMS të Shqipërisë. Në një postim në Twitter, Këshilli i Sigurisë Kombëtare në Shtëpinë e Bardhë e konsideron atë një “sulm keqdashës”, duke theksuar se po mbështesin vendin tonë në përpjekjet për të rikthyer në normalitet sistemin. “Shtetet e Bashkuara dënojnë sulmin kibernetik të 9 shtatorit kundër aleatit tonë të NATO-s, Shqipërisë. Ky aktivitet keqdashës kundër Shqipërisë vjen pas sulmit kibernetik të 15 korrikut të kryer nga qeveria e Iranit. Qeveria e SHBA po mbështet përpjekjet e Shqipërisë për të hetuar dhe për t’u rimëkëmbur”, thuhet në postim. Sistemi TIMS u sulmua mbrëmjen e 9 shtatorit, ndërsa kryeministri Edi Rama bëri përgjegjës Iranin për sulmin, ku tha se është e njëjta dorë që sulmoi shërbimet publike online në muajin korrik. Si pasojë e këtij sulmi, për pak kohë u paralizua punë në aeroportin e Rinasit, por pas ndërhyrjeve, u arrit që të viheshin në punë dy sportele. Pikërisht për shkak të kërcënimit të sigurisë së vendit nga sulmi kibernetik Shqipëria ndërpreu marrëdhëniet diplomatike me Iranin.https://lajme.rtsh.al/artikull/sulmi-kibernetik-i-iranit-ndaj-sistemit-tims-shba-aktivitet-keqdashes-po-mbeshtesim-shqiperine-ne-kthimin-ne-normalitet
- Advertisment -