Serbia heq ndalimin e hyrjes për aktivistin anti Putin

Dy ditë pasi iu ndalua hyrja në Serbi, vendi ballkanik lejoi aktivistin rus kundër luftës, Pjotër Nikitin të hyjë në territorin serb, sipas një postimi në profilin e Nikitin në Facebook. Asnjë arsye zyrtare nuk u dha as për ndalimin e hyrjes dhe as për heqjen e tij. Kritiku i njohur i presidentit rus Vladimir Putin, i cili themeloi platformën kundër luftës, ”Shoqëria Demokratike Ruse”, ka organizuar disa protesta në Serbi kundër pushtimit rus të Ukrainës. Nikitinit iu refuzua hyrja në aeroportin e Beogradit të enjten, pasi u ul atje pas një pushimi në Portugali. Vendimin e policisë kufitare serbe ai e ka publikuar online. Kritiku i Kremlinit ka shtatë vjet që jeton në Serbi me leje qëndrimi dhe ka dy fëmijë atje. “Nuk ka asnjë shpjegim tjetër [për sjelljen e policisë kufitare] përveç aktiviteteve të mia kundër luftës në kuadrin e Shoqërisë Demokratike Ruse”‘, shkroi Nikitin. Sipas njoftimeve të medias serbe, urdhri për ndalimin e hyrjes është dhënë nga Agjencia e Brendshme e Shërbimit Sekret serb (BIA). Kreu i agjencisë, Aleksandar Vulin, i është shtuar listës së sanksioneve amerikane të martën. Sipas njoftimit të sanksionit, Vulin abuzoi me pozitën e tij të pushtetit për të mbështetur Rusinë në destabilizimin e vendeve të Ballkanit. Vulin konsiderohet si një ndjekës besnik i presidentit serb Aleksandar Vuçiç, i cili ka mbajtur marrëdhënie të mira me Moskën që nga fillimi i luftës së saj kundër Ukrainës. Serbia ka negociuar me Bashkimin Evropian për t’iu bashkuar grupit që nga viti 2014. Shteti ballkanik nuk i mbështet sanksionet e BE-së të vendosura kundër Rusisë pasi ajo filloi pushtimin e saj në Ukrainë në shkurt 2022.