Scholz: Sulmi bërthamor, një vijë e kuqe që nuk duhet prekur kurrë

Kancelari gjerman, Olaf Scholz përshëndeti takimin mes liderëve të SHBA-së dhe Kinës, duke dërguar një mesazh të qartë se përdorimi i armëve bërthamore përbën një “vijë të kuqe” që nuk duhet prekur kurrë. “Presidenti i SHBA-së, Joe Biden dhe presidenti kinez, Xi Jinping ranë dakord në bisedimet e tyre në Bali se lufta bërthamore nuk duhej të bëhej kurrë, përfshirë në Ukrainë”, sipas Shtëpisë së Bardhë. Qëndrimi i Kinës nënkuptonte një kritikë ndaj presidentit rus Vladimir Putin, një aleat kyç. Putin dhe Kremlini kanë lënë të kuptohet për përdorimin e mundshëm të armëve të bërthamore për qëllime mbrojtëse. Scholz tha se ishte e rëndësishme që të dy liderët të bënin të qartë se përdorimi i armëve bërthamore duhej të përjashtohej dhe se kjo ishte një vijë e kuqe që nuk duhej të kalohej. Pas vizitave të mëparshme në Vietnam dhe Singapor, kancelari gjerman, Scholz mbërriti të hënën në mbrëmje në ishullin indonezian, Bali për samitin e G20 të fuqive kryesore ekonomike që fillon të martën dhe që pritet të fokusohet në luftën e Rusisë në Ukrainë. “Do të jetë një tjetër udhëtim i vështirë”, tha Scholz duke iu referuar bisedimeve. Presidenti rus, Vladimir Putin përfaqësohet nga ministri i tij i Jashtëm Sergei Lavrov. Presidenti ukrainas, Volodymyr Zelensky do të mbajë një fjalim përmes një lidhjeje me video.https://ata.gov.al/2022/11/14/indonezi-scholz-sulmi-berthamor-nje-vije-e-kuqe-qe-nuk-duhet-prekur-kurre/