Kancelari gjerman, Olaf Scholz mbrojti politikën e migracionit të qeverisë së tij në komentet në parlament dhe theksoi nevojën e vendit për të tërhequr të huaj të aftë.
“Nuk ka asnjë vend në botë me një popullsi pune në tkurrje që të ketë rritje ekonomike. Kjo është e vërteta me të cilën po përballemi”, tha Scholz në Bundestag.
Vërejtjet e tij vijnë mes debatit të tensionuar dhe të ashpër në Berlin mbi politikën e migracionit dhe azilit.
Të martën në mbrëmje, bisedimet ndërpartiake midis koalicionit të Scholz dhe opozitës së qendrës së djathtë dështuan me kritika të ashpra.
Politika e migracionit ka qenë tema dominuese në debatin politik, që kur një sulmues me thikë vrau tre persona dhe plagosi tetë të tjerë muajin e kaluar në qytetin perëndimor gjerman të Solingenit.
Sulmuesi i dyshuar është një 26-vjeçar sirian, i cili i ishte shmangur urdhrit për t’u deportuar nga Gjermania në Bullgari, ku ishte regjistruar për herë të parë në Bashkimin Evropian.
Scholz theksoi nevojën për të qëndruar të hapur ndaj imigracionit në Gjermani, ndërsa gjithashtu menaxhon dhe kontrollon siç duhet ardhjet.
“Ne jemi një vend që ofrojmë mbrojtje për ata që janë të përndjekur politikisht, që vrapojnë për jetën e tyre, që duhet të shpëtojnë jetën e tyre dhe kjo është në kushtetutën tonë dhe ne nuk po e vendosim këtë për debat”, tha Scholz.
“Prandaj, hapja ndaj botës është e nevojshme. Por, hapja ndaj botës nuk do të thotë që kushdo që dëshiron mund të vijë. Ne duhet të jemi në gjendje të zgjedhim se kush vjen në Gjermani. Unë e them këtë në mënyrë të qartë’’, shtoi kancelari.
