Rusia shkatërron depot e grurit në portet ukrainase

Dronët rusë kanë sulmuar portet e Ukrainës në lumin Danub duke shkatërruar infrastrukturën e magazinimit të grurit, thonë zyrtarët lokalë, sipas BBC. Objektet janë shumë pak larg bregut tjetër të Danubit, që lag Rumaninë, anëtare e NATO-s. Danubi është një rrugë kryesore eksporti për Kievin që kur Rusia u tërhoq nga një marrëveshje që lejon Ukrainën të transportojë grurë, misër dhe produkte të tjera nëpërmjet Detit të Zi. Një depo drithi u shkatërrua gjithashtu në qytetin port të Detit të Zi, Odesa, i cili është nën sulm pothuajse çdo natë. Zyrtarët thonë se më shumë se 60 000 tonë drithë janë shkatërruar javën e kaluar. Tregjet globale kanë parë rritjen e çmimit të drithit me 8% brenda një dite pas tërheqjes së Rusisë nga marrëveshja e grurit, më 17 korrik. Prishja e marrëveshjes do të thotë gjithashtu se Rusia ka rifilluar shënjestrimin e vendeve portuale në Ukrainë, të cilat ishin pezulluar gjatë marrëveshjes. Mediet rumune raportuan se ushtarët dhe marinarët në anën e kundërt të lumit mund të shihnin drita të ndritshme dhe të dëgjonin afrimin e dronëve dhe shpërthimet. Një gazetar e përshkroi atë si goditjen më të afërt me territorin rumun që nga fillimi i luftës. Danubi, si dhe rrugët rrugore dhe hekurudhore nga Ukraina në Poloni, Rumani dhe vende të tjera fqinje, janë zhvilluar si kanale eksporti që nga pushtimi rus. Dy milionë tonë drithë janë eksportuar nga lumenjtë vitin e kaluar, krahasuar me 600 000 një vit më parë. atsh