Rigjallërim i liqenit të Shkodrës për mbarështimin e krapit

Ministria e Bujqësisë dhe Zhvillimit Rural, në bashkëpunim me FAO-n synojnë rigjallërimin e Liqenit të Shkodrës, përmes teknikave të mbarështimit të përdorura nga peshkatarët me përvojë tek peshkatarët e rinj. Gjatë sezonit të riprodhimit në prill 2022, ekspertët e FAO-s punuan me peshkatarët për të ndërtuar rrethime të përkohshme rrjete për të mbështetur depozitimin e vezëve për mbarështimin e krapit që njihet si “mbreti i Liqenit të Shkodrës”. “Ne kemi punuar me peshkatarët për të rikuperuar traditat e tyre dhe për t’i përdorur ato për të mbështetur praktikat e qëndrueshme duke krijuar mundësi që krijojnë vende pune, mbrojnë mjedisin dhe mbështesin jetesën në planin afatgjatë,” thotë Nicoletta Milone, oficere e peshkimit në FAO. Projekti AdriaMed përfshin gjithashtu plane për ngritjen e një çerdheje për të prodhuar një furnizim të besueshëm dhe të mjaftueshëm të vogëlushëve të peshkut dhe për të siguruar qëndrueshmëri afatgjatë në liqenin e Shkodrës. Roland Kristo, zëvendësministër i Ministrisë së Bujqësisë dhe Zhvillimit Rural të Shqipërisë, i cili është përgjegjës për peshkimin dhe akuakulturën, thotë se projekti tashmë ka dhënë rezultate dhe se peshkimi i liqenit do të ketë një të ardhme. “Ne besojmë fuqimisht se me një bashkëpunim të mirë dhe me përfshirjen e të gjithë aktorëve, ne mund të arrijmë zhvillimin e qëndrueshëm të peshkimit tonë dhe të sigurojmë menaxhimin e duhur të burimeve tona,” thotë Kristo. Ndërsa Arben Kipi, ndihmëspërfaqësuesi i FAO-s në Shqipëri, thotë se kjo nismë luan një rol të rëndësishëm edhe në uljen e varfërisë, pasi përmirëson jetesën e peshkatarëve duke gjeneruar të ardhura më të qëndrueshme. Nisma e projektit AdriaMed feston Vitin Ndërkombëtar të Peshkimit Artizanal dhe Akuakulturës (IYAFA 2022) i cili njeh dhe mbështet kontributin e peshkimit dhe akuakulturës artizanale në shkallë të vogël për zhvillimin e qëndrueshëm. https://ata.gov.al/2022/11/22/rigjallerim-i-liqenit-te-shkodres-per-mbareshtimin-e-krapit/