Pritet të nisë së shpejti projekti i rehabilitimit të shtegut panoramik dhe ndriçimi monumental i ishullit të Maligradit. Lajmin e dha në rrjetet sociale, prefekti i qarkut Korçë, Nertil Jole, sipas të cilit projekti është hartuar nga Drejtoria Rajonale e Trashëgimisë Kulturore Korçë, me mbështetje financiare të Bashkimit Evropian, Ministrisë të Kulturës të Shqipërisë dhe asaj të Maqedonisë të Veriut. Ky rehabilitim vjen në kuadër të projektit “Smart4you2”. Jetësimi i projektit, pritet të rrisë numrin e vizitorëve të Prespës, si një destinacion shumë i veçantë i qarkut Korçë. Maligradi është një ishull i vogël i cili ndodhet në pjesën shqiptare të Liqenit të Prespës. Ai karakterizohet nga një numër i madh shpellash, të përshtatshme për faunën e egër. Në brendësi të ishullit gjendet kisha e Shën Marisë. Një mbishkrim në faqen jugore, më i hershmi në këtë kishë, i përket vitit 1345 dhe fazës së parë të zbukurimit të kësaj kishe me afreske. Kjo kishë është një atraksion turistik i rëndësishëm jo vetëm për parkun kombëtar të Prespës, por për mbarë rajonin dhe Shqipërinë. Në Maligrad janë gjetur edhe objekte si tjegulla, kolona e kapitele që sipas arkeologëve i përkasin një kishe paleokristiane që mendohet të ketë qënë në pjesën e sipërme të liqenit. ATA
- Advertisment -