​Radoiçiç konfirmon organizimin e sulmit në Banjskë

Millan Radoiçiç e ka pranuar se ka qenë në fshatin Banjskë të Zveçanit, më 24 shtator dhe se i ka bërë të gjitha përgatitjet logjistike për ngjarjet e asaj dite. Ai e ka bërë këtë deklaratë përmes një letre të lexuar nga avokati i tij, Goran Petronijeviç gjatë një konference për media në Beograd. “Unë personalisht i kam bërë të gjitha përgatitjet logjistike për mbrojtjen e popullit tonë kundër pushtuesit dhe ky akt i imi nuk ka asnjë karakter apo qëllim tjetër, dhe nuk ka të bëjë fare me të kaluarën time”, thuhet në letrën e Radojçiçit, të lexuar nga avokati i tij. Si pasojë e përleshjeve të Policisë me një grup terrorist në këtë pjesë në veri të Kosovës, kanë vdekur një zyrtar policor dhe tre sulmues.