Gjatë nëntë muajve të parë të vitit 2025, shumica e tregtimit të titujve të shtetit është bërë jashtë Bursës. Pjesa më e madhe e parave është qarkulluar në ankandet ku shteti shet tituj për të marrë hua dhe në pagesat që bën për titujt që u ka mbaruar afati.
Më shumë se gjysma e tregtimit ka qenë me obligacione, që janë tituj me afat të gjatë, ndërsa pjesa tjetër me bono thesari, që kanë afat më të shkurtër. Edhe pse obligacionet kanë pasur vlerë më të madhe, numri më i madh i tregtimeve është bërë me bono, sepse ato janë më të thjeshta dhe më të shpejta për t’u kthyer në para.
Pothuajse të gjitha blerjet dhe shitjet i kanë bërë qytetarët e zakonshëm, jo kompanitë apo bankat. Ata kanë kryer mbi 98% të të gjitha transaksioneve, që tregon se njerëzit po zgjedhin t’i investojnë kursimet e tyre në tituj të shtetit, sepse i konsiderojnë të sigurta.
Nga ana tjetër, bankat dhe shoqëritë që merren me tregtimin e këtyre titujve kanë bërë më pak veprime se një vit më parë. Shitjet e tyre kanë rënë ndjeshëm, ndërsa blerjet kanë pasur vetëm një rritje të vogël. Në disa lloje tregtimesh nuk është kryer asnjë veprim.
Në total, krahasuar me vitin e kaluar, vlera e tregtimit të këtyre titujve ka qenë rreth 5 miliardë lekë më e ulët.
