Qeveria zvicerane autorizoi sot eksportin e 25 tankeve luftarake në Gjermani. “Gjermania ka dhënë garanci se tanket “Leopard 2″ nuk janë të destinuara për Ukrainën”, theksoi qeveria zvicerane në një deklaratë në Bernë. Megjithatë, pajisjet ushtarake do të përdoren për të rimbushur stoqet në Gjermani ose vende të tjera të Bashkimit Evropian ose NATO-s që janë varfëruar nga dërgesat në Ukrainë. Ministri gjerman i Ekonomisë, Robert Habeck dhe ministri i Mbrojtjes Boris Pistorius kishin kërkuar që tanket t’i shiten përsëri prodhuesit gjerman “Rheinmetall Landsysteme GmbH” në shkurt. Në fund të shtatorit, Dhoma e Lartë e parlamentit zviceran, Këshilli i Shteteve, ndoqi Dhomën e Ulët, Këshillin Kombëtar, në miratimin e tërheqjes së pajisjeve ushtarake nga stoqet e ushtrisë zvicerane.
