Stresi ndikon direkt në shëndetin mendor dhe atë fizik. Trupi aktivizon mekanizmin e njohur si ‘lufto ose ik” teksa njeriu përballet me stresin. Ky lloj mekanizmi ka si qëllim që të ndihmojë organizmin t’i mbijetojë një situate potencialisht të rrezikshme. Ai nxit çlirimin e disa hormoneve, që mund të ngadalësojnë funksionet e sistemit imunitar, rrisin tensionin e gjakut dhe rrahjet e zemrës.
Në momentin që organizmi percepton që rreziku është larguar, njeriu është në gjendje që të qetësohet dhe funksionet rikthehen në normalitet.
Nëse stresi vijon në mënyrë të vazhdueshme, mekanizmi “lufto ose ik” është gjithë kohës aktiv dhe çliron hormone që nënshtrojnë sistemin imunitar. Kështu, njeriu është tepër i brishtë ndaj sëmundjeve.
Por si të përballeni me stresin?
Ekspertët japin disa këshilla për tu përballur më lehtë me stresin dhe pasojat. Hiqni dorë nga teknologjia për disa orë në ditë dhe kaloni më shumë kohë në natyrë. 10 minuta në natyrë kanë një ndikim zbutës të stresit. Lexoni një libër. Bëni joga. Kryeni 30 minuta aktivitet fizik. Gatuani një vakt të shëndetshëm për veten dhe familjen.
Mbani ditar për ngjarjet e ditës. Flisni me një shok/shoqe, të afërm ose dikë që e doni dhe ju përkrah. Instaloni aplikacione që ndihmojnë në qetësim, ose kundër stresit. Këto aplikacione në telefonin tuaj ju ndihmojnë dhe ju tregojnë si të meditoni, merrni frymë dhe shkëputeni nga situatat stresuese. Një njeri i stresuar është konfuz dhe i paqartë në mendime dhe flet shumë shpejt. Praktikoni të folurën e ngadaltë duke u përqendruar tek fjalët, mendimet dhe reagimet. Pini ujë, sepse dehidratimi shton ankthin.
