Franca, Gjermania dhe Italia përmes një letre të përbashkët i kanë kthyer përgjigje kryeministrit të Kosovës lidhur me idenë për të hartuar një tjetër draft statut për Asocacionin e komunave me shumicë serbe. Në këtë letër dërguar kryeministrit të Kosovës, Albin Kurti, ata deklarojnë se mbështesin draft-statutin e propozuar nga i dërguari i posaçëm i Bashkimit Evropian për dialogun Prishtinë-Beograd, Mirosllav Lajçak, për themelimin e një Asociacioni të komunave me shumicë serbe. Në letrën e përbashkët të presidentit të Francës Emmanuel Macron, kancelarit gjerman Olaf Scholz dhe kryeministres së Italisë Giorgia Meloni më 15 maj thuhet se draft-statuti i paraqitur nga Lajçak nuk është thjesht “një propozim zotërinjsh”.
