Prefekti i qarkut të Kukësit, Granit Gjana informoi sot mbi situatën e rrugëve pas reshjeve të borës në këtë qark. Gjana tha se rrugët nacionale janë të qarkullueshme normalisht dhe nga subjektet kontraktore ka vazhduar puna për pastrimin, kriposjen dhe mbajtjen funksionale të gjitha akseve rrugore nacionale. Në bashkinë Kukës, rrugët rurale në administrim janë të kalueshme me zinxhirë, përveç rrugëve të Njësisë Administrative Arrën, Zapod dhe Kalis në të cilat edhe sot nga bashkia do të angazhohen forca dhe mjete për ç’bllokimin e tyre. Ndërsa në bashkitë Tropojë dhe Has nuk ka asnjë rrugë të bllokuar. “Furnizimi me energji elektrike mungon vetëm në Njësinë Administrative Topojan dhe disa fshatra të Njësisë Administrative Malzi dhe po punohet për përmirësimin e situatës. Furnizimi me ujë të pijshëm është normal”, njoftoi Prefekti Gjana.
