“Prada”, shtëpia italiane luksoze e modës, e themeluar në vitin 1913 në Milano nga Mario Prada – ka njoftuar zyrtarisht blerjen e kompanisë rivale të modës “Versace”.
Më herët, marrëveshja u vlerësua në vlerën prej 1,25 miliardë euro.
“Prada”, portofoli i së cilës përfshin gjithashtu kompanitë e modës “Miu Miu” dhe “Church’s”, ka blerë të gjitha aksionet e “Versace” të mbajtura nga kompania amerikane e veshjeve luksoze “Capri Holdings”- pasi mori të gjitha miratimet e kërkuara rregullatore.
Komisioni Evropian në Bruksel dha miratimin për blerjen e “Versace” në shtator.
Çmimi i blerjes së kompanisë gjigante të modës “Versace”, e themeluar në vitin 1978, është nën 1,5 miliardë euro.
“Prada”, e cila daton që nga viti 1913, zbuloi zyrtarisht planet e saj për blerjen e “Versace” në prill, pas disa muajsh spekulimesh.
Sipas gazetës “Corriere della Sera”, ka patur disa pengesa që duhej të kapërceheshin përpara se dy shtëpitë italiane të modës të bashkoheshin.
Tarifat ndëshkuese të vendosura nga presidenti i SHBA-së Donald Trump ndaj vendeve të tjera – përfshirë Italinë – ishin gjithashtu një shkak i shqetësimeve.
Si “Prada” ashtu edhe “Versace” janë ndër emrat më të mëdhenj në modën italiane.
Themeluesi i kompanisë, Gianni Versace, u vra në Shtetet e Bashkuara të Amerikës në vitin 1997.
Në mars, motra e tij, Donatella Versace dha dorëheqjen nga posti i saj si drejtoreshë pas pothuajse tre dekadash në këtë rol.
Ajo u pasua nga Dario Vitale, i cili më herët punonte për “Miu Miu”.
