Portugalia vuan mungesën e mjekëve, merr 300 kubanezë

Pikërisht në ditët kur po zhvillohet një grevë kombëtare e mjekëve portugezë, më 5 dhe 6 korrik, dhe sistemi shëndetësor kombëtar vazhdon të tregojë se nuk është gjithmonë i aftë t’u përgjigjet nevojave të popullatës, mbërrijnë lajme që tashmë po shkaktojnë diskutime dhe alarmojnë urdhrat e profesionistëve dhe sindikatave. Sipas njoftimeve për shtyp, Ministria e Shëndetësisë ka qenë në bisedime prej të paktën një muaji me Havanën për rekrutimin e 300 mjekëve kubanë, për të punuar në shëndetin publik në Portugali. Për këtë, ministria, e cila konfirmon synimin e saj për të importuar mjekë të huaj, pavarësisht se nuk ka konfirmuar shtetësinë e tyre, i ka kërkuar tashmë Ministrisë së Arsimit dhe Urdhrit Kombëtar të Mjekëve që të lehtësojnë procedurat për njohjen e kualifikimit dhe regjistrimin e tyre. Sindikatat u përgjigjën menjëherë se ky punësim masiv nuk zgjidh mangësitë e sistemit shëndetësor kombëtar. Presidenti i Urdhrit tha se nuk ka asgjë kundër ardhjes së mjekëve nga jashtë, ndërsa paralajmëroi procedura të nxituara që mund të dëmtojnë si cilësinë dhe sigurinë e shërbimit, ashtu edhe parimin e barazisë. Ai kujtoi se në Portugali janë të paktën 50 mjekë ukrainas në pritje të njohjes së tyre. Në vitin 2009, kur ministri aktual Manuel Pizarro ishte nënsekretar i Shëndetësisë, Portugalia kishte kërkuar disa dhjetëra mjekë kubanë. Nëse ky punësim prej 300 profesionistësh do të realizohej, pas spanjollëve dhe brazilianëve, në institucionet shëndetësore portugeze, kubanezët do të kalonin numrin e mjekëve italianë që operojnë në vend dhe që aktualisht numërojnë 227. atsh