Polonia i ka ofruar Ukrainës një mbështetje ushtarake me vlerë ekuivalente prej rreth 8,4 miliardë euro (9 miliardë dollarë) gjatë dy viteve të fundit, tha sot qeveria. “Gjithsej, 44 pako me armatime i janë dorëzuar Kievit”, tha ministri i Jashtëm Radosław Sikorski gjatë një fjalimi në parlamentin polak. “Polonia i ka ofruar Ukrainës 300 tanke dhe automjete luftarake, 14 avionë luftarakë dhe helikopterë, sisteme të mbrojtjes ajrore dhe municione”, thanë ekspertët ushtarakë. Sikorski vazhdoi duke thënë se Polonia kishte shpenzuar 16 miliardë euro për ndihmën humanitare në Ukrainë dhe për mbështetjen e refugjatëve ukrainas të luftës në Poloni që nga fillimi i pushtimit të gjithanshëm të Rusisë në shkurt 2022. “Rreth 950 000 njerëz nga Ukraina kanë marrë një numër të përkohshëm identifikimi personal- ID – i njohur si PESEL – në Poloni”, tha ai. ID-ja e bën më të lehtë marrëdhënien me autoritetet dhe sistemin shtetëror të kujdesit shëndetësor. Numri PESEL përdoret nga Polonia si bazë për përcaktimin e numrit të njerëzve që kërkojnë mbrojtje. “Megjithatë, numri i ukrainasve që Polonia ka pranuar është ndoshta shumë herë më i lartë”, tha Sikorski. Kryediplomati i Polonisë i bëri thirrje Perëndimit që të mbështesë me vendosmëri Ukrainën. “Ne jemi përballur me një alternativë të thjeshtë, ne mund të përballemi me një ushtri të mundur ruse të vendosur në kufirin lindor të Ukrainës ose me një ushtri fitimtare në kufirin lindor të Polonisë”, tha Sikorski. Sikorski gjithashtu paralajmëroi presidentin rus Vladimir Putin për rrezikun e sulmit ndaj një vendi të NATO-s. “Nuk jemi ne – Perëndimi – që duhet të kemi frikë nga një konfrontim me Putinin, por anasjelltas”, tha ai duke shtuar se shpresa e vetme e Putinit ishte mungesa e vendosmërisë së tyre.
