Ambasadori i Japonisë në Shqipëri, Takada Mitsuyuki, si dhe zëvëndëspërfaqësuesi i përhershëm i PNUD në Shqipëri, Francisco Roquette, zhvilluan një vizitë pune në bashkinë e Dibrës, ku diskutuan mbi zbatimin e projektit “Transformimi i tregut për përshpejtimin e energjisë diellore PV në Shqipëri”. Në takimin me kryetarin e bashkisë së Dibrës, Rahim Spahiu, u diskutua rreth bashkëpunimit me UNDP-në dhe ndërhyrjet e projektit që konsistojnë në instalimin e paneleve diellore fotovoltaike në katër institucione publike. Gjatë kësaj vizite, ambasadori i Japonisë në Shqipëri, Takada Mitsuyuki, si dhe zëvëndëspërfaqësuesi i përhershëm i PNUD në Shqipëri, Francisco Roquette, panë nga afër investimin në panele diellore fotovoltaike që janë instaluar në godinën e bashkisë, shkollat “Said Najdeni”, “Demir Gashi” dhe “Irfan Hajrullai”. Ky projekt i zbatuar nga UNDP, me financim të qeverisë japoneze ka një ndikim të rëndësishëm në mbrojtjen e mjedisit, eficiencën e energjisë dhe rritjes së standardit të jetesës. Përmes këtij investimi do të sigurohet jo vetëm përfitim ekonomik dhe financiar, por edhe mjedisor për përdoruesit e ndërtesave publike, ku një nga sistemet më popullore të përdorimit është prodhimi i energjisë përmes panele diellore, që synon të shtrihet edhe në objekte të tjera të bashkisë Dibër, por edhe zona të tjera të vendit.
