Drejtoria e Përgjithshme Detare njoftoi për përkeqësim të motit në bregdetin shqiptar në tri ditët në vijim.
Drejtoria bën të ditur se sipas parashikimit për situatën hidrometeorologjike, përgjatë bregdetit shqiptar gjatë datave 19 – 22 tetor 2023, duke filluar nga ora 10:00 e datës 19 tetor 2023, do të ketë përkeqësim të motit.
“Era do të jetë me drejtimin jug – juglindje në forcën deri në forcën 7-8 bft me shpejtësi deri 30-35 m/s dhe lartësi dallge nga 2.50 deri 3.50 m. Me qëllim parandalimin e çdo situate të papritur për shkak të kushteve atmosferike, kërkojmë bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gatishmërisë së ekuipazhit në mjetet lundruese”, thuhet në deklaratën e Drejtorisë.
Përmirësimi i situatës hidrometeorologjike të përkeqësuar do të jetë mbas orës 6:00 të datës 22 tetor 2023.
