Për shkak të vërshimeve, në Klinë e Skenderaj nuk ka mësim sot

Në dy komunat e Kosovës, Skenderaj e Klinë nuk do të mbahet mësimi sot për shkak të reshjeve të pandërprera të shiut dhe vërshimet që përfshinë disa lokalitetet të këtyre komunave. Kështu kanë njoftuar përfaqësues të këtyre dy komunave, që janë prekur më së shumti nga vërshimet e dy ditëve ë fundit. “Duke e parë gjendjen e krijuar si pasojë e reshjeve të vazhdueshme të shiut, ku në disa fshatra qarkullimi është vështirësuar në masë të madhe, Drejtoria Komunale e Arsimit, në konsultim me drejtorë të shkollave dhe prindër, ka vendosur që nesër, ditë e premte, të mos mbahet mësim në shkollat e komunës së Klinës”, thuhet në njoftim e Komunës së Klinës. Vendimi është marr, sipas këtij vendimi, për shkaqe të sigurisë së nxënësve, ndërsa për hapat tjerë do të informohen drejtorët e shkollave. Po ashtu edhe në Komuna Skenderajt ka lajmëruar se nuk do të ketë mësim. “Për shkak të gjendjes së jashtëzakonshme pas reshjeve të shumta të shiut dhe vërshimeve të shumta, nesër (ditën e premte) nuk do të mbahet mësimi në shkollat e komunës sonë. Gjithashtu, anulohen të gjitha aktivitetet e tjera të parapara për ditën e nesërme”, njofton Komuna e Skenderajt. Madje komuna e Skenderajt, ka shpallur edhe gjendje të jashtëzakonshme pasi disa lagje të Llaushës, por edhe vetë qyteti u përfshi nga vërshimet, të cilat shkaktuan dëme të konsiderueshme në ekonomitë familjare, bujqësi e infrastrukturë. RTK