PE voton pezullimin e çdo marrëveshjeje që përfshin Katarin

Parlamenti Evropian votoi sot për të pezulluar çdo çështje që përfshin Katarin, pasi votoi për largimin e Eva Kailit nga posti si zëvendëspresidente, pas arrestimit me akuzën për korrupsion. Gjithsej 541 ligjvënës të BE-së e mbështetën mocionin, ndërsa vetëm dy deputetë votuan kundër rezolutës. “Parlamenti Evropian pezullon të gjithë punën në dosjet legjislative të lidhura me Katarin, veçanërisht në lidhje me liberalizimin e vizave dhe vizitat e planifikuara, derisa dyshimet të konfirmohen ose të hidhen poshtë”, thuhet në një draft të mocionit. Draft teksti kërkonte gjithashtu krijimin e një organi të pavarur të etikës. ”Për më tepër, më shumë staf dhe para’ duhet të vihen në dispozicion për të monitoruar dhe verifikuar më mirë përfaqësuesit që konkurrojnë për ose në regjistrin e lobit të BE-së, i cili gjithashtu duhet të shtrihet tek përfaqësuesit nga vendet jashtë BE-së”, thuhet në propozimin e mocionit. Presidentja e Parlamentit Evropian Roberta Metsola deklaroi se ajo ”do të drejtonte vetë reformat në legjislaturën e BE-së”. ”Po përgatis një paketë të madhe reformash për të qenë gati në vitin e ri. Unë do ta drejtoj këtë punë personalisht”, theksoi Metsola. Ajo njoftoi gjithashtu një vështrim “gjithëpërfshirës dhe të thellë” se si Parlamenti ndërvepron me vendet jashtë BE-së.https://ata.gov.al/2022/12/15/strasburg-pe-voton-pezullimin-e-cdo-marreveshje-qe-perfshin-katarin-pas-skandalit-per-korrupsion/