Parlamenti Evropian tha se termat që lidhen me mishin nuk duhet të përdoren për produktet me bazë bimore, sipas “tgcom24”.
Termi “vegjetarian” nuk mund të përdoret në lidhje me hamburgerët, salçiçet dhe eskallopët.
Dhoma e Përfaqësuesve në Strasburg miratoi sot ndryshimet në rregulloren e Organizatës së Përbashkët të Tregjeve Bujqësore (CMO) me 532 vota pro, 78 kundër dhe 25 abstenime, duke përfshirë një ndryshim të propozuar nga raportuesja e PPE-së, Celine Imart.
Masa ndalon përdorimin e termave që lidhen me mishin për produktet me bazë bimore, të tilla si “hamburger vegjetarian” apo “salçiçe tofu”.
Çdo ndalim praktik do të kërkojë një marrëveshje me vendet anëtare te BE-së gjatë negociatave mbi propozimin.
Ndryshimi në rregullore ka marrë miratimin e Komitetit të Bujqësisë në shtator.
Dokumenti thotë se terma të tillë si “biftekë, eskallop, salçiçe, hamburgerë, të bardha dhe të verdha vezësh – duhet të rezervohen ekskluzivisht për produktet që përmbajnë mish.
Përkufizimi i ri i mishit – i propozuar nga raportuesja franceze – përbën “pjesë të ngrënshme të kafshëve”.
Kreu i grupit të PPE-së, Manfred Weber, duke folur në Strasburg nuk e quajti amendamentin e paraqitur nga raportuesja franceze “një prioritet”, duke konfirmuar se grupi ishte i ndarë për këtë çështje.
Që prej vitit 2020, Parlamenti Evropian duhej të vendoste për mundësinë e një ndalimi – si pjesë e rishikimit të Rregullores së CMO-së nga PPB-ja – një përpjekje që përfundimisht u refuzua nga seanca plenare e Strasburgut.
Rishikimi i Rregullores së CMO-së u propozua nga Komisioni Evropian në përgjigje të protestave të vitit 2024 për traktorët – për të forcuar pozicionin negociues të fermerëve në zinxhirin e furnizimit.
