Paralajmërojnë shkencëtarët: Përballuni me katastrofën!

Shkencëtarët kanë lëshuar një “paralajmërim urgjent për njerëzimin” për ndikimin global të zhdukjes së pemëve. Një dokument i ri parashikon pasoja të rënda për njerëzit, jetën e egër dhe ekosistemet e planetit nëse humbja e pemëve vazhdon. “Vitin e kaluar, ne publikuam raportin e Gjendjes së Pemëve në Botë, ku treguam se të paktën 17,500 lloje pemësh, rreth një e treta e 60,000 llojeve të pemëve në botë, janë në rrezik zhdukjeje,” tha Malin Rivers, autori kryesor i punimit dhe kreu i prioritizimit të ruajtjes në Botanic Gardens Conservation International (BGCI). “Pa vepruar tani, kjo do të ndikojë në njerëzimin, ekonomitë dhe jetesën tonë. Ekologjikisht, do të ketë një ndikim katastrofik në planet”, paralajmëroi ai. Sipas studimit, pyjet e botës kontribuojnë 1.3 trilion dollarë në ekonominë globale. Në nivel global, më shumë se 1.6 miliardë njerëz jetojnë brenda 5 km nga një pyll dhe mbështeten tek pemët për punë dhe para. Në vendet në zhvillim, pyjet sigurojnë deri në 25% të të ardhurave familjare. Zhdukja në shkallë të gjerë e llojeve të pemëve do të çonte në humbje të mëdha të biodiversitetit. Gjysma e specieve të kafshëve dhe bimëve në botë mbështeten te pemët si habitat i tyre, me pyje që përmbajnë rreth 75% të specieve të shpendëve, 68% të specieve të gjitarëve dhe deri në 10 milionë lloje jovertebroresh. Llojet e varura nga pyjet kanë rënë tashmë me rreth 53% që nga viti 1970 . “Kur shikojmë rreziqet e zhdukjes për gjitarët ose zogjtë, në themel të kësaj është humbja e habitatit dhe humbja e habitatit është shpesh humbja e pemëve. Nëse nuk kujdesemi për pemët, nuk ka asnjë mënyrë që të kujdesemi për të gjithë jetën tjetër atje”, tha Rivers