Pandeli Cale, ndër firmëtarët e Pavarësisë

Në kuadër të 110-vjetorit të shpalljes së Pavarësisë të Shqipërisë, Muzeu Historik Kombëtar ka nisur një projekt i cili synon të njohë publikun me rrugën e mundimshme të firmëtarëve të aktit të pavarësisë së Shqipërisë, si edhe artefakte të tyre. Muzeu Historik Kombëtar përcolli në këtë kuadër fakte rreth Pandeli Cales, nënshkrues i Pavarësisë së Shqipërisë dhe ministri i parë i Bujqësisë, Tregtisë dhe Industrisë. Pandeli Cale lindi në Korçë, më 16 mars 1879. Shkollimin fillor e mori në vendlindje, mandej kreu liceun klasik francez të Aleksandrisë, në Egjipt. Në vitet 1900-1904 punoi në Bukuresht ku merr pjesë në lëvizjen e mërgimtarëve të atjeshëm. Më 1904 kthehet në Shqipëri, ku bashkëpunon me patriotët e kohës Thimi Marko, Themistokli Gërmenji, Sami Pojani, Orhan Pojani, Foqion Turtulli, etj. Pas revolucionit xhonturk të 1908-ës zhvilloi veprimtari të gjerë në organizimin e klubeve e shoqërive patriotike në Korçë. Ai ka qenë kryetar i shoqërisë “Banda e Lirisë”, më 1 tetor 1908. “Banda e Lirisë” shoqëroi me marshe kombëtare dhe ekzekutoi këngë patriotike më 14 shkurt 1910 në mitingun për mbrojtjen e shkronjave shqipe. Në shkurt 1909, ka qenë sekretar i shoqërisë “Lidhja ortodokse” kryesuar nga Mihal Grameno. Në rritjen e lëvizjes së armatosur të viteve 1911-1912 Pandeli Cale dha një kontribut të çmuar. Rreth gusht-shtatorit 1912 largohet nga Shqipëria dhe shkon në Bukuresht. Aty merr pjesë në mbledhjen e 5 nëntorit 1912 dhe niset me delegacionin që shoqëron Ismail Qemalin për në Shqipëri. Më 28 nëntor 1912, si delegat i qytetit të Korçës, firmos manifestin e pavarësisë me siglën “Pandeli Cale”. Në qeverinë e parë kombëtare, Calja merr në dorë drejtimin e ministrisë së bujqësisë, industrisë dhe tregtisë.https://ata.gov.al/2022/11/10/pandeli-cale-nder-firmetaret-e-pavaresise/