Ministrja e Arsimit dhe Sportit, Evis Kushi, theksoi sot se “deri në fund të mandatit qeverisës pagat e mësuesve do të rriten me 40%”. Në një replikë në Kuvend duke iu përgjigjur akuzave të kryetarit të Partisë Demokratike, Sali Berisha, ministrja Kushi tha se “Berisha deklaroi se pagat e mësuesve nuk janë rritur asnjëherë këto vite, ndërkohë që mësuesit e dinë shumë mirë dhe ju e dini shumë mirë që pagat e mësuesve në mandatin e kaluar u rritën me 32% dhe në mandatin në të cilin jemi do të rriten me 40%”. “Jemi angazhuar për këtë dhe deri në fund të mandatit pagat do të rriten me 40% “, tha Kushi. Në lidhje me portalin e mësuesve, Kushi u shpreh se “është pikërisht ky portal që i vlerëson me dinjitet, meritokraci dhe transparencë. Është pikërisht ky portal që i jep mundësinë edhe mbështetësve tuaj, dhe bën shumë mirë, që nëse janë të renditur të parët në portal të fillojnë punë me kontratë definitive. Rastet janë më se të freskëta, mësuesit që kanë qenë të parët janë mbështetësit tuaj, sot janë me kontratë definitive”. “Berisha bëri thirrje për protesta, unë kam një tjetër natyrë thirrjeje: nesër është Dita Ndërkombëtare e Gjuhës së Shenjave, dua ta shfrytëzoj këtë moment se për herë të parë Instituti i Nxënësve që Nuk Dëgjojnë do të kenë shkollë të mesme. Për herë të parë nxënësit që nuk dëgjojnë e nuk flasin nuk do të rrinë më në shtëpi kur mbarojnë klasën e 9-të. Do të jetë një shkollë e orientuar për teknologji dhe TIK, ata do të jenë të aftë për veten e tyre, do të integrohen në shoqëri, por pse jo, do të japin edhe kontribut për shoqërinë”, tha Kushi.https://ata.gov.al/2022/09/22/kushi-pagat-e-mesuesve-40-rritje-deri-ne-fund-te-mandatit-qeverises/
- Advertisment -