Eshtë gazi më i rëndësishëm i atmosferës ose ndryshe O3 i cili ndodhet deri në 60km lartësi nga sipërfaqja e tokës. Rëndësia e gazit ozon qëndron në aftësinë e tij për të absorbuar rrezatimin valëshkurtër diellor, kryesisht atë UV dhe IR dhe si rezultat, temperatura e atmosferës në këtë zonë rritet duke krijuar një lloj rezervuari energjitik për atmosferën. Përmbajtja e O3 në shtresat e ulëta, poshtë 10 km nga sipërfaqja e tokës, është e papërfillshme pasi në sipërfaqen e tokës, në varësi nga muaji apo zona gjeografike, përmbajtja e O3 arrin deri në 10-4 g/m3. Me ngjitjen lart, përmbajtja e tij ndryshon në mënyrë të parregullt. Vetëm për lartësinë mbi 10 km ka një rritje të qartë të përqëndrimit të O3 me një maksimum në 20-25 km lartësi nga toka ndërsa mbi këtë nivel, përmbajtja e tij ulet deri sa zhduket në 60 km. Sasia e përgjithshme e O3 mund të shprehet me shtresën e O3 kjo është sasia e ozonit që gjendet në një shtyllë me sipërfaqe të prerjes tërthore s = 1cm2 në kushte të shtypjes atmosferike normale (p = 760 mmHg) dhe quhet shtresa e sjellë e ozonit ku për të gjithë trashësinë e atmosferës vlerësohet 3.0 mm. Shpërndarja e ozonit sipas vertikales atmosferike ndryshon sipas zonës dhe muajit, më e dukshme në shtresat e poshtme deri 25 km.
