Kombet e Bashkuara thanë sot se numri i grave dhe vajzave të vrara në mbarë botën në vitin 2022 është rritur në nivelin më të lartë në 20 vjet. “Rreth 89 000 gra dhe vajza u vranë qëllimisht vitin e kaluar”, raportoi organizata e OKB-së përgjegjëse për gratë, “UN Women” dhe organizata e OKB-së përgjegjëse për drogën dhe krimin, UNODC. “Numri alarmant i femicideve është një kujtesë e fortë se njerëzimi është ende duke u përballur me pabarazitë e rrënjosura thellë dhe dhunën kundër grave dhe vajzave”, tha drejtoresha ekzekutive e UNODC, Ghada Waly në një deklaratë. “Çdo jetë e humbur është një thirrje për veprim, një lutje për të adresuar urgjentisht pabarazitë strukturore, për të përmirësuar përgjigjet e drejtësisë penale, në mënyrë që asnjë grua apo vajzë të mos ketë frikë për jetën e saj për shkak të gjinisë së saj”, tha ajo. Më shumë se gjysma e këtyre vrasjeve, rreth 55%, janë kryer nga familjarë apo partnerë, krahasuar me rreth 12% të viktimave meshkuj të vrasjeve. Numri më i madh i vrasjeve të grave dhe vajzave, rreth 20 000 është regjistruar në Afrikë, e ndjekur nga Azia.
