OKB rikonfirmon përkushtimin ndaj objektivave të ngecura të SDG

193 vendet anëtare të Kombeve të Bashkuara kanë miratuar një deklaratë për të rikonfirmuar përkushtimin e tyre ndaj Objektivave të ngecura të Zhvillimit të Qëndrueshëm (SDG). Dokumenti u miratua njëzëri në një mbledhje, një ditë para fillimit të Debatit të Përgjithshëm të Asamblesë së Përgjithshme të OKB-së, ku priten fjalime të udhëheqësve nga e gjithë bota. Një grup shtetesh të udhëhequr nga Rusia kishin kërcënuar se do të bllokonin deklaratën e SDG-së, por në fund nuk e ndoqën kërcënimin e tyre. Sekretari i Përgjithshëm i OKB-së, António Guterres tha se deklarata e miratuar sot mund të jetë një “ndryshues i lojës në përshpejtimin e progresit të SDG-së”. Deklarata përfshin angazhimin për financimin e vendeve në zhvillim dhe mbështetjen për një paketë stimuluese për SDG-në me vlerë të paktën 500 miliardë dollarë në vit. 17 SDG-të kanë për qëllim t’i japin fund urisë dhe varfërisë ekstreme deri në vitin 2030. Objektivat u vendosën në vitin 2015. Sidoqoftë, pandemia e koronavirusit, lufta në Ukrainë dhe kriza e borxhit në vendet e varfra i kanë lënë pas qëllimet. Sipas OKB-së, nëse gjërat vazhdojnë siç janë, 575 milionë njerëz do të vazhdojnë të jetojnë në varfëri ekstreme dhe më shumë se 600 milionë do të jetojnë në uri në vitin 2030. Kancelari gjerman, Olaf Scholz bëri thirrje për më shumë përpjekje për të arritur qëllimet. “Ne shohim se progresi që kërkuam në luftën kundër varfërisë për të gjithë botën është ngadalësuar, duke mos arritur përmirësimet që dëshironim”, tha Scholz në Nju Jork.