Pjesa veriore e Rripit të Gazës ka vetëm një spital që ende pranon pacientë për shkak të luftimeve midis ushtrisë izraelite dhe Hamasit islamik dhe mungesës së karburantit, deklaroi OKB. ”Spitali Al-Ahli në qytetin e Gazës është ende funksional, por me kapacitet minimal”, njoftoi Zyra e Kombeve të Bashkuara për Koordinimin e Çështjeve Humanitare (OCHA). OCHA tha se të gjitha spitalet e tjera kanë ndaluar funksionimin për shkak të mungesës së energjisë elektrike, furnizimeve mjekësore, oksigjenit, ushqimit dhe ujit. Aktualisht janë rreth 500 pacientë në spitalin Al-Ahli. Gjatë natës, Forcat e Mbrojtjes të Izraelit (IDF) hynë në një pjesë të spitalit Al Shifa, spitali më i madh në Rripin e Gazës. ”Bazuar në informacionin e inteligjencës dhe një domosdoshmëri operacionale, forcat IDF po kryejnë një operacion të saktë dhe të synuar kundër Hamasit në një zonë specifike të spitalit Shifa”, theksoi ushtria izraelite në Telegram. Izraeli argumenton se aktiviteti i Hamasit i bën spitalet objektiva legjitime.
