Organizata Botërore e Shëndetësisë (OBSH) dëshiron të krijojë spitale fushore në Rripin e Gazës pas shkatërrimit të rëndë të shkaktuar nga sulmet izraelite, deklaroi përfaqësuesi i OBSH-së për territoret e pushtuara palestineze, Richard Peeperkorn. ”Para fillimit të luftës, në Rripin e Gazës kishte rreth 3 500 shtretër spitalorë. Sot ka vetëm 1 400 në dispozicion. Për më tepër, çdo ditë 50 deri në 60 pacientë të sëmurë rëndë duhet të nxirren nga Rripi i Gazës sa më shpejt të jetë e mundur për të marrë trajtimin adekuat në Egjipt”, theksoi Peeperkorn. I prekur rëndë është edhe kujdesi në klinikat mjekësore, prej të cilave jo më shumë se 60% janë ende në funksion. Peeperkorn nuk u përgjigj nëse Izraeli kishte dhënë ndonjë tregues se do të binte dakord për evakuimin dhe ndërtimin e spitaleve në terren.
