OBSH bën thirrje për t’i dhënë fund subvencioneve të duhanit në bujqësi

Organizata Botërore e Shëndetësisë (OBSH) bëri thirrje për t’i dhënë fund subvencioneve qeveritare për fermat e duhanit në shumë vende, duke përmendur dëmin që ai shkakton për shëndetin e njeriut. “Duhani është përgjegjës për tetë milionë vdekje në vit, megjithatë qeveritë në mbarë botën shpenzojnë miliona për të mbështetur fermat e duhanit”, tha shefi i OBSH-së Tedros Adhanom Ghebreyesus përpara Ditës Botërore kundër Duhanit, më 31 maj. “Duke zgjedhur të kultivojmë ushqim në vend të duhanit, ne i japim përparësi shëndetit, ruajmë ekosistemet dhe forcojmë sigurinë ushqimore për të gjithë”, tha ai. OBSH përmendi vendet evropiane që kultivojnë duhan në një raport, duke përfshirë Maqedoninë e Veriut, e cila është ndër 20 eksportuesit më të rëndësishëm të duhanit në botë. Kultivimi i duhanit në këtë vend merr subvencione deri në 2,507 dollarë për hektar, ndërsa gruri mbështetet me një maksimum prej 269 dollarësh. “Në Zvicër, fermerët e duhanit morën më mbi 32 milionë dollarë subvencione midis 2015 dhe 2020”, thuhet në raport. “Në SHBA dhe Argjentinë, disa qindra milionë dollarë nga paratë e taksapaguesve u derdhën në kultivimin e duhanit, gjatë kësaj periudhe”, sipas raportit. Në total, bimët e duhanit rriten në 3.2 milionë hektarë në 124 vende në mbarë botën, ku shumë punëtorë të fermave sëmuren nga ekspozimi jashtëzakonisht i lartë i nikotinës.