Sëmundja e Parkinsonit, një gjendje që është e vështirë për t’u diagnostikuar të paktën në fazat e hershme, një ditë mund të “zbulohet” me një test të thjeshtë gjaku: kjo është shpresa e rindezur nga një studim i sapo publikuar në Science Translational Medicine, shkruan focus.it. Në bazë të analizave, të cilat do të vërtetohen me analiza të mëtejshme klinike, është e mundur të identifikohen dëmtimet gjenetike të mitokondrive (qendrat energjetike të qelizave) të lidhura me këtë sëmundje në gjak. Parkinson është një sëmundje neurodegjenerative që ndodh kur vdekja e disa popullatave të neuroneve në tru shkakton një rënie të dopaminës, një neurotransmetues i rëndësishëm. Me kalimin e kohës, pacientët zhvillojnë dridhje, ngurtësi muskulore, ngadalësim të lëvizjes, paqëndrueshmëri të ekuilibrit, si dhe probleme në kryerjen e veprimeve, formulimin e mendimeve dhe gjuhës abstrakte, si dhe ndryshime në sjellje dhe humor. Studimet e kaluara kanë treguar se pacientët me Parkinson shpesh kanë një mosfunksionim të mitokondrive, organelet me ADN-në e tyre që u japin energji qelizave. Laboratoret kanë zhvilluar një test që mund të përcaktojë sasinë e dëmtimit gjenetik në mitokondri në një mostër gjaku të marrë. Analiza lejoi që grupet deri në 50 persona me Parkinson të identifikoheshin saktë në bazat e të dhënave që përmbanin edhe vlera nga njerëz të shëndetshëm. Jo vetëm kaq: testi gjithashtu “vuri re” se sasia e ADN-së mitokondriale të dëmtuar ishte më e lartë në gjakun e një pacienti të Parkinsonit që mbante një mutacion të rrallë (LRRK2) i cili rrit rrezikun për t’u sëmurë nga kjo patologji.
