Kryeministri i Kosovës, Albin Kurti ka folur në kuvendin zgjedhor të partisë Guxo me të cilën ka thënë se kanë bërë punë të mira në qeverisje. Kurti tha se bashkëpunimi i Lëvizjes Vetëvendosje me partinë Guxo duhet të vazhdojë, derisa për këtë të fundit theksoi se është ngritur me guxim dhe njësoj sipas tij edhe do të fitojë. Gjatë këtij fjalimi, shefi i ekzekutivit tha se prioritet mbetet vetingu në sistemin e drejtësisë. “Të qenit bashkë na e solli edhe fitoren e 14 shkurtit, të pirur për ta zhvilluar vendin përmes punësimit dhe kthimin e dinjitetit të qytetarëve përmes drejtësisë. Prioritet kryesor në drejtësi mbetet vetingu i sistemit të drejtësisë dhe këtë do ta bëjmë bashkë me Kuvendin. Duhet të vazhdojmë këtë punë kaq të mirë bashkë. Viti e kaluar e kemi mbyllur me 10.53% rritje ekonomike, kurse në tremujorin e parë të këtij viti kemi rritje ekonomike 4.9% pasi të hiqet inflacioni. Kemi ngritur mirëqenien sociale me një sërë masash të pakos së rimëkëmbjes ekonomike”, tha Kurti. Kurti ka përmendur punët e qeverisë, ku tha se po zbatojnë reforma në bujqësi me qëllim të ngritjes së prodhimit, cilësisë dhe sigurisë së ushqimit. Gjithashtu ka thënë se kanë zgjeruar lidhjet e Kosovës me botën duke e kthyer bendin në integrimet euroatlantike dhe ndërkombëtare. “Bashkërisht po zbatojmë reforma në bujqësi me qëllim ngritjen e prodhimit, cilësisë dhe sigurisë së ushqimit, si dhe ringjalljen e fshatit, arsimin përveç se e kemi bërë falas, e kemi ngrit buxhetin mbi 12% me qellim të rritjes së cilësisë, kemi zgjeruar lidhjet e Republikës sonë me botën dhe kemi kthyer Kosovën në integrimet euroatlantike dhe ndërkombëtare. Më lejoni ta falënderoj përzemërsisht zëvendëskryeministren dhe ministren e Jashtme (Donika) Gërvalla për përpjekjet e përbashkëta të deritanishme dhe për arritjet e pamohueshme”, tha ai. Kryeministri Kurti u është drejtuar rreth 400 delegatëve të pranishëm të cilët do të zgjedhin organet e partisë Guxo. “Po punojmë pa kursim, pa rezervë e pa pushim. I përgëzoj të gjithë për angazhimin me dije dhe integritet me punë dhe përkushtim për partinë që përfaqëson po këto vlera. U uroj punë të suksesshme të kuvendit zgjedhor, me guxim jeni ngritur, me guxim po vazhdoni, me guxim do të fitoni”, përfundoi ai.http://ata.gov.al/2022/09/07/kurti-ne-kuvendin-e-guxo-te-qenit-bashke-na-solli-fitoren-e-14-shkurtit/
- Advertisment -