Në fshatin Juban është drejt përfundimit argjinatura mbrojtëse për zonën nga prurjet e lumit Drin. Drini është lumi më i gjatë jo vetëm i vendit tonë, por edhe i Ballkanit Perëndimor me një sipërfaqe të përgjithshme të pellgut ujëmbledhës prej 14173 km2 dhe gjatësi 285 km. Ky lumë formohet nga bashkimi i Drinit të Zi, i cili buron nga Liqeni i Ohrit, në një kuotë 694 m, duke përshkuar një rrugë 40 km jashtë territorit të vendit tonë. Nga ana tjetër, Drini i Bardhë buron në malësinë e Zhbelit, në trajtën e një burimi karstik, dhe pasi merr me vete edhe disa lumenj te rangut më të ulët si Toplugen, Bistricën e Prizrenit, Erenikun etj derdhet në liqenin e Fierzës, duke përshkruar një rrugë me gjatësi rreth 136 km.
