Kundërshtari i Kremlinit, Alexei Navalny aktualisht ndodhet në një kamp penal në Rusinë veriore pasi u zhduk për më shumë se dy javë, tha sot zëdhënësja e tij, Kira Yarmysh në X. Navalny kishte dështuar edhe një herë të paraqitej në një seancë gjyqësore përmes një lidhjeje me video më 18 dhjetor duke rritur frikën për fatin e tij. Kritiku më i hapur i presidentit Vladimir Putin nuk ishte parë nga avokatët e tij për gati dy javë përpara seancës së planifikuar. Autoritetet e qeverisë ruse kishin refuzuar të zbulonin se ku ndodhej ai ose të shpjegonin plotësisht mungesën e tij. Tani rezulton se ai është transferuar nga kolonia penale IK-6 në lindje të Moskës në objektin IK-3 në Kharp në veriun e largët të Rusisë, 2000 kilometra nga Moska.
