Duke sjellë shpresë të re për pacientët që vuajnë nga sëmundja e Alzheimerit, shkencëtarët izraelitë dhe italianë kanë zbuluar një mënyrë të re për të luftuar këtë çrregullim duke synuar një proteinë të dëmshme në fazat e hershme të tij. Deri më tani, shumica e trajtimeve për Alzheimer janë përpjekur të ndalojnë një formë të ndryshme të proteinës, të quajtur beta amiloid (A-beta). Por, studimet e fundit tregojnë se është në fakt një version i hershëm i A-beta që shkakton më shumë dëme në tru, duke çuar në humbje të kujtesës dhe simptoma të tjera.
Nuk ka kurë për sëmundjen e Alzheimerit që ndikon në kujtesën, mendimin kritik dhe sjelljen e pacientit. Trajtimet fokusohen në menaxhimin e simptomave dhe përmirësimin e cilësisë së jetës. Profesori Shai Rahimipour, i Universitetit Bar-Ilan në Ramat Gan, duke punuar së bashku me shkencëtarët italianë Angelo Monguzzi dhe Marcello Campione nga Universiteti i Milano-Bicocca, zhvilluan nanogrimca që mund të njohin dhe sulmojnë proteinën A-beta në fazat e hershme dhe të vonshme.
Gjetjet, të publikuara në revistën ”Advanced Healthcare Materials”, tregojnë premtimin për ngadalësimin e përparimit të Alzheimerit tek njerëzit me probleme të lehta të kujtesës. Studiuesit shpjeguan se nanogrimcat së pari lidhen me A-beta. Kur aktivizohen nga rrezet X me energji ultra të ulët, nanogrimcat pengojnë A-beta të grumbullohet së bashku dhe gjithashtu ulin toksicitetin e proteinave. Kjo qasje potencialisht do t’i lejojë mjekët të synojnë dhe rrezatojnë në mënyrë selektive rajonet e prekura të trurit, duke minimizuar rrezikun e efekteve anësore të lidhura me terapitë tradicionale të bazuara në antitrupa.
Studimet paraprake kanë demonstruar sigurinë dhe efektivitetin e qasjes në modelet paraklinike, duke hapur rrugën për eksplorim të mëtejshëm në provat klinike njerëzore. ”Qëllimi ynë përfundimtar është të zhvillojmë një trajtim të sigurt dhe efektiv për individët në fazat e hershme të Alzheimerit, me fokus tek ata me rrezik të lartë, siç janë ata me Alzheimer familjar”, tha Rahimipour. “Duke synuar grumbullimin e A-beta në fazën e hershme, ne synojmë të parandalojmë përparimin e sëmundjes dhe të përmirësojmë cilësinë e jetës për pacientët dhe familjet e tyre”, shtoi ai
