Muzeu Etnografik i Krujës, restaurohet dekoracioni në Odën e Burrave

Në Muzeun Etnografik të Krujës vijojnë punimet për restaurimin, procesit të muzealizimit dhe përmirësimit të ekspozimit të artefakteve. Specialistë të Sektorit të Veprave të Artit të Institutit Kombëtar të Trashëgimisë Kulturore inspektuan nga afër ecurinë e punimeve, të cilat kanë për qëllim restaurimin dhe konservimin e pikturës murale dhe elementëve të drurit të dekoruar. Instituti Kombëtar i Trashëgimisë Kulturore bëri të ditur se punimet po vijojnë në Odën e Burrave me restaurimin e tavanit të dekoruar dhe pikturës murale. Falë programit EU4Culture, ndërtesa e Muzeut Etnografik të Krujës po i nënshtrohet ndërhyrjeve restauruese, procesit të muzealizimit dhe përmirësimit të ekspozimit të artefakteve. Shumë shpejt ky muze do të mund t’iu flasë vizitorëve jo vetëm me artefakte, por edhe nëpërmjet veprave të artit. Muzeu Etnografik i Krujës, ka më shumë se 1000 objekte me vlerë, të cilat po i nënshtrohen procesit të pastrimit, për t’u restauruar dhe ekspozuar në muzeun e rijetësuar. Me mbështetjen e programit EU4Culture janë duke u restauruar një sërë objektesh e sitesh të trashëgimisë kulturore. EU4Culture shtrihet në të gjithë territorin e prekur nga tërmeti i vitit 2019 dhe ka një buxhet total prej 40 milionë eurosh.