MSHMS: Spitali i Tepelenës nuk do të mbyllet

Ministria e Shëndetësisë dhe Mbrojtjes Sociale, në reagim të lajmeve të publikuara nga disa medie lidhur me mbylljen e Spitalit të Tepelenës, sqaron se nuk ka asnjë plan për ta mbyllur spitalin. “Plani Kombëtar Spitalor ka si qëllim organizimin e një kujdesi cilësor spitalor, kosto efektive të infrastrukturës dhe burimeve njerëzore, në përputhje me sëmundshmërinë, demografinë, gjeografinë dhe nevojat e paplotësuara.Në kuadër të këtij plani janë analizuar aktivitetet e spitaleve, burimet njerëzore, aparaturat dhe distancat”, theksohet në deklaratën për shtyp të MSHMS-së. MSHMS bën të ditur se “Spitali i Tepelenës ka 72 shtretër dhe në vitin 2022 ka kryer gjithsej 160 shtrime, 35 EKG, 7 Echo, asnjë ekzaminim roentgenografik. Koeficienti i shfrytëzimit të shtratit ka qenë rreth 3 %”. Sipas MSHMS-së, gjatë vitit 2022 ka ofruar rreth 3500 vizita në urgjencë. “Pra, qytetarëve të Tepelenës i është shërbyer kryesisht me shërbim 24-orësh”, shton MSHMS. Ministria e Shëndetësisë dhe Mbrojtjes Sociale nënvizon se spitali i Tepelenës nuk do të mbyllet, por do të transformohet gradualisht në një spital që do t’i shërbejë më mirë nevojave të popullsisë me demografi të ndryshuar, ku është shtuar popullsia e moshuar, dhe nevojave që ka kjo popullsi, të paplotësuara deri tani, siç është kujdesi paliativ, geriartria e riaftësimi. “Shtretërve të destinuar në planin e vjetër për kirurgji, obstetrikë etj., do t’iu ndryshojë destinacioni për nevojat reale të qytetarëve të Tepelenës, në këtë etapë të transformimeve të ndodhura në shëndetësi. Ky transformim që do të ndodhë gradualisht, është bërë i mirëmenduar dhe i konsultuar me të gjitha strukturat, përfshirë edhe strukturat vendore të Tepelenës. Është konsultuar publikisht dhe është lancuar edhe në Kongresin e Parë të Shëndetësisë në mars të vitit 2023”, përfundon deklarata e MSHMS-së.