Prefekti i qarkut të Tiranës, Afrim Qëndro ka zhvilluar sot inspektime në Kavajë dhe në zonën e plazhit te Mali i Robit për garantimin e sigurisë së pushuesve. Ai theksoi se po monitorohet situata në secilin plazh. “4 plazhe të bllokuara dhe disa subjekte të gjobitura në Kavajë nga policia bashkiake pasi subjektet që i kishin në përdorim nuk kishin plotësuar detyrimet ligjore për roje bregdetare dhe elementë të tjerë sigurie të domosdoshëm. Me tolerancë zero ndaj kujtdo, garantojmë pushuesit që frekuentojnë këto hapësira dhe parandalojmë ngjarje potenciale me pasojë në jetë njerëzish. Më mirë një plazh më pak sesa një plazh i pasigurt e jashtë çdo standardi. Jam në komunikim të vazhdueshëm me kryetarët e Kavajës e Rrogozhinës që kanë vijë bregdetare në territorin e tyre të monitorojnë rreptësisht situatën në secilin plazh”, tha ai. Qëndro shprehet se në këtë periudhë të gushtit ku fluksi i vizitorëve dhe turistëve është i madh, vëmendja do të jetë maksimale.
- Advertisment -