Ne duam të kemi marrëdhënie sa më të mira me të gjitha vendet fqinje, përfshirë Shqipërinë, deklaroi kryeministri grek, Kyriakos Mitsotakis, gjatë konferencës vjetore për shtyp të dhënë nga shefi i qeverisë greke, si çdo vit, në Panairin Ndërkombëtar të Selanikut, sipas primeminister.gr.
”Ne duam marrëdhëniet më të mira të mundshme me të gjithë fqinjët tanë. Këta fqinjë përfshijnë Shqipërinë”, deklaroi Mitsotakis.
”Kaluam një kohë të vështirë dhe nuk dua të flas në detaje për rastin e Fredi Belerit. Të shpreh kënaqësinë time për faktin që ai ishte me ne në Ekspozitën Ndërkombëtare dhe që kjo aventurë krejtësisht e padrejtë dhe e panevojshme që ai kaloi, më në fund mbaroi”, shtoi ai.
”Më lejoni të them edhe një herë se marrëdhëniet, në një fushëpamje të madhe, marrëdhëniet midis Greqisë dhe Shqipërisë, që ne duam të jenë marrëdhënie shumë të mira, kalojnë në respektimin e të drejtave të pakicës kombëtare greke të Shqipërisë”, tha Mitsotakis.
”Çështja e të drejtave pronësore nuk ka dalë asnjëherë nga agjenda. Ajo po kthehet dhe ajo që ne do të bëjmë është të sigurojmë, me ndihmën e Fredi Belerit në Parlamentin Evropian, që të drejtat pronësore të bashkatdhetarëve tanë në Shqipëri të respektohen plotësisht. Dhe do të thosha se ky është një kusht i domosdoshëm që Shqipëria të vazhdojë të ecë në rrugën e saj evropiane”, përfundoi ai
