Mbi 100 garues nga 15 vende të ndryshme të botës në turin çiklistik

Turi i 80-të çiklistik i Shqipërisë, me pjesëmarrjen e 15 ekipeve nga vende të ndryshme të botës dhe mbi 100 garues nisi dje në sheshin “Nënë Tereza”, i cili do të vijojë deri më 26 maj. Në ceremoninë e nisjes së këtij turi mori pjesë ministrja e Shtetit për Rininë dhe Fëmijët, Bora Muzhaqi, së bashku me Skënder Anxhaku, president i Federatës së Çiklizmit, Fidel Ylli, president i KOKSH, Endri Hoxha, zv.ministër i MAS dhe Andi Seferi nënkryetar i bashkisë Tiranë. Gjithashtu i pranishëm në këtë ceremoni ishte dhe Yehoshua Kopito, kryekomisari i UÇI turin e çiklizmit, pjesë edhe në unionin Ndërkombëtar të Çiklizimit, e cila i jep pikë skuadrave për pjesëmarrjen në olimpiadën e vitit të ardhshëm në Paris 2024. Çiklistët në këtë tur do të eksplorojnë 900 km me nivele të ndryshme vështirësie. Aktiviteti çiklistik përfshin 5 etapa garash me itinerare të gjata në disa nga akset rrugore kombëtare. Etapa e parë më 22 maj nisi në orën 12:00 me itinerarin sheshi “Nënë Tereza”, Tiranë – Elbasan – Dushk – Lushnjë. Në kthim ndiqet i njëjti itinerar, për të përfunduar në Krrabë, në orën 16:30. Etapa e dytë nisi sot në orën 12:00, me itinerarin sheshi “Nënë Tereza”, Tiranë –Elbasan – Lushnjë dhe përfundon në qendër të Elbasanit, në orën 17:00. Etapa e tretë nis më datë 24.05.2023, në orën 12:00, me itinerarin bulevardi “Aqif Pasha”, Elbasan – Lushnjë – Fier dhe përfundon në Vlorë, në orën 16:15. Etapa e katërt starton më 25 maj në orën 12:00, me itinerarin Lungomare, Vlorë – Fier – Mbrostar Ura, Fier – Levan – Tepelenë dhe përfundon në Përmet, në orën 18:30 dhe etapa e pestë starton më 26 maj në orën 10:00, me itinerarin qendra e Përmetit – Tepelenë – Levan dhe përfundon në Fier, në orën 13:00. Duke qenë se aktiviteti çiklistik përfshin gjatësi dhe itinerare rrugore në pjesën më të madhe të akseve kombëtare që lidhin jugun e Shqipërisë me qendra të tjera të rëndësishme, Policia e Shtetit apelon dhe kërkon mirëkuptimin e qytetarëve që të shmangin qarkullimin në rrugët që janë pjesë e itinerarit, në oraret e zhvillimit të aktivitetit. atsh