Mashtrimi kompjuterik, Policia:Vijoni denoncimet

Policia e Shtetit njofton se si në kuadër të apelit të bërë një ditë më parë, lidhur me një hetim ndaj një fushate kundër mashtrimit kompjuterik, është arritur të parandalohen pasojat e mëtejshme nga kjo veprimtari në dëm të qytetarëve. Në njoftimin e publikuar sot nga Policia e Shtetit, bëhet me dije se, “Drejtoria për Hetimin e Krimeve Kibernetike, dje, më datë 22.06.2023, është vënë në dijeni të një fushate mashtrimi nëpërmjet sistemeve kompjuterike e cila synonte persona fizikë dhe juridikë, pa dallime të caktuara, me qëllim marrjen e shumave të ndryshme monetare”. “Nga veprimet e shpejta të ndërmarra nga Drejtoria për Hetimin e Krimeve Kibernetike, përsa i përket njoftimit të të gjithë qytetarëve dhe kontaktimit të çdo shtetasi apo subjekti të prekur nga kjo veprimtari kriminale, sot konstatojmë se kemi arritur të parandalojmë pasojat e mëtejshme, si dhe dëmet monetare për qytetarët. Puna policore vijon për hetimin e ngjarjes, si dhe për identifikimin e autorëve”, njofton Policia e Shtetit. Nëse këto njoftime shfaqen në postën tuaj elektronike, Policia u bën apel qytetarëve që për çdo problematikë që mund të hasin, të kontaktojnë Drejtorinë për Hetimit e Krimeve Kibernetike, në adresën e postës elektronike ç@asp.gov.al. Drejtoria për Hetimin e Krimeve Kibernetike do të japë më shumë informacion rreth kësaj situate, në ditët në vijim.